TEXAGA, in Glossis veteribus est intra tecta, quomodo accipi videtur in Lege Salica tit. 11. § 4 :

Si quis homo ingenuus alienum servum in Texaga secum duxerit, aut aliquid cum eo negotiaverit, etc.

Ubi Wendelinus, in texaga, in furto tecto, et non manifesto, seu clam, significare ait ; ut et in Lege Aleman. tit. 99. § 25 :

Si quis servum mulinarium involaverit, alium cum ipso reddat, et solvat sol. 6. in Texaga, cujus fuerit.

Editio Heroldi cap. 104. habet ferrum, pro servum, et in Lege Ripuar. tit. 63 :

Si quis hominem in hoste interfecerit, triplici weregeldo culpab. judicetur ; de Texaga similiter.

Ubi Editio Heroldi, de furto similiter, habet. Monet Baluzius aliquot Codices Legis Ripuariæ tit. 18. § 1. tit. 82. cap. 1. et alibi texagam habere, ubi alii furtum. Vetus formula obnoxiationis :

Quod ego caballum ab homine aliquo..... in Texaga subduxi ; unde de ipso furtu victus apparui.

Vide Testeia et Thenca.