TRAVA. Videtur sic dicta, nescio quæ præstatio in blado, avena, etc. ex agris domino pensitari solita, incerta mihi vocis origine : tametsi Trava videatur fuisse mensuræ species. Miracula S. Joannis Beverlacensis n. 7 :

Et quidem coloni illius provinciæ hesterasda, id est, quod exigebatur ad pabulum equorum Regis singulis annis solebant Regis præfectis reddere, videlicet de unaquaque caruca, id est, ad cultrum et vomerem, quatuor Travas de suis frugibus, et talis reditus inter vectigalia Regia computabatur et exigebatur a regione illa, etc.

Monasticum Anglic. tom. 1. pag. 175 :

In Foresthill, duas acras de dominicatu, et de singulis virgatis unam Travam. In una Horspeda 3. acras, et de singulis virgatis unam Travam, etc.... de Dentona 4. Travas de omni blado.

Adde pag. 985. Hist. Fundationis Monast. S. Leonardi Ebor. :

Concessit..... de qualibet caruca arante in Episcopatu Eboraci unam Travam bladi, anno 936. quæ usque in præsentem diem dicitur Petercorne, cujusmodi et Travas Reges tunc temporis potuerunt sacris locis ex sua regalitate concedere et assignare. Et nihilominus ex consensu incolarum Episcopatus Eboraci Rex habuit Travas prædictas sibi et successoribus suis, sic quod exterminaret lupos patriam devastantes.

Idem Monastic. tom. 2. pag. 380 :

Dictum hospitale dotatum fuit... ad percipiendum de qualibet carucata terræ arabilis in Kipschire unam Travam de quolibet genere bladorum, et valet per annum 20. sol.

Tom. 3. pag. 93 :

Unam Travam bladi de singulis carucis villæ meæ, etc.

Parte 2. pag. 3 : Travæ garbarum. Charta Joannis Regis Angl. apud Gul. Prynneum in Libertat. Eccles. Anglic. tom. 3. pag. 8 :

Firmiter præcipientes, quod sine contradictione et difficultate reddant de carrucis suis ad ostia grangiarum suarum Travas S. Joannis Beverlaci per manum propriam, vel servientium suorum, sicut facere solebant, antequam Travæ illæ datæ essent ad firmam, etc.