WEREGELTEF, seu Weregelt-thef, Quæ quidem ita interpretatur Somnerus, ut latro, qui redimi potest, sit is, cujus vita, pretio, pro capitis sui æstimati ratione, persoluto redimatur, siquidem occulti latrocinii reus sit, secus autem si manifesti. At Bromptonus Weregelthef ait esse, solutionem latronis evasi, id est, (Gallice) soute de larron eschappé. Quam quidem interpretationem non video cur improbet idem Somnerus, cum definitioni ex Fleta non repugnet. Latronis enim, qui evaserat e carcere, pretium reddere tenebantur, qui ejus custodiam habebant, ut in voce Escapium observamus, proinde pretium illud fuerit Weregeltthef, id est, Weregeldum latronis ; est enim thef, latro. Quale autem in Scotia fuerit Weregeldum, seu æstimatio furis, habes in Regiam Majestatem lib. 3. cap. 19 :

De unoquoque fure per totam Scotiam est Wergelt 30. vaccæ una juvenca, sive fuerit liber homo, sive servus.