1. CAPITULARE, Scriptum capitulis distinctum. Glossæ Græc. Lat. : Κεφάλαιον, γραφεῖον, Capitulare.

Descriptio Capitularis

, in Charta Folcuini Morinorum Episcopi, apud Folcardum de Miracul. S. Bertini cap. 7. 8. Papias : Capitulum, quod vulgo Capitulare dicitur. Gregorius M. lib. 1. Epist. 40 :

Joannes frater et Coepiscopus noster directo per Justum Clericum suum Capitulari, inter alia plura hoc nobis noscitur intimasse, etc.

Adde lib. 7. Epist. 8. lib. 10. Ep. 5. lib. 11. Ep. 19. lib. 12. Ep. 8. Adrianus PP. in Epist. ad Carolum M. :

Edidit nobis Capitulare adversus Synodum. Capitulare Augustorum,

in Capitul. Car. C. tit. 40. cap. 2. Convent. Attiniac. ann. 874. Ibidem cap. 1 :

Capitulare Augustorum Domni Caroli et Domni Ludovici decernit hoc modo, etc.

ubi Capitulare est Collectio Benedicti. Agobardus de Insolentia Judæorum :

Deinde venerunt et prædicti Missi, habentes in manibus tractoriam stipendialem, et Capitularia sanctionum, quæ non putamus vestra jussione existere talia.

Adde Epist. 1. Leonis III. ex Conringianis. Vide Capitulum 2. Capitulare Evangeliorum de circulo anni, ita appellatus liber Ecclesiasticus, in quo describuntur initia et fines cujusque Evangelii, quod singulis diebus in Missa legitur. Will. Heda in Conrado Episcopo Traject. :

Missale, Capitulare, et Historiam vetus novumque Testamentum continentem, etc.

Vide V. Cl. Stephanum Baluzium in Notis ad libros Capitular. pag. 1156. Capitularia Apostolica, in Gestis Innocentii III. PP. pag. 126. Capitularis libellus, in Capitula dispertitus, apud Guibertum lib. 1. de Vita sua cap. 16. extremo. Capitulare institutum, Regula monastica per capitula distincta, apud Ardonem in Vita S. Benedicti Abb. Anianæ num. 36.

2. CAPITULARE, Capitulis aliquid distinguere, apud Jo. de Janua. Vita S. Wunebaldi Abbatis Heidenhemensis num. 21 :

Ista vero quæ nunc Capitulamus atque disputamus, oculis nostris vidimus.

Guidonis Disciplina Farfensis lib. 1. cap. 27 :

Item Alleluia, Audivit Herodes, et cetera sicuti Capitulata sunt in Authentico.

Apud Rymerum tom. 12. pag. 129. col. 2 :

Quæ omnia et singula, prout præmittitur, Capitulata, concordata, conclusa, et in præsentibus articulis contenta, etc.

Gallis Capituler est Pacisci de arce vel urbe dedenda, et generalius Convenire de re aliqua.

3. CAPITULARE, Operimentum capitis. Vide Capitulum 6.

4. CAPITULARE. Alicujus Sancti officium celebrare, peragere, a Capitulo saltem incipiendo. Vetus Ceremoniale MS. B. Mariæ Deauratæ Tolosanæ :

Non dicuntur subphragia Sanctorum, neque Vespere omnium SS. nec Laudes, et hoc tam in vigilia, quam in die, et per omnes Octavas : dato etiam quod non Capitulantur de Octavis.

Et infra :

Sequitur festum Apostolorum Philippi et Jacobi, quod est duplex... in primis Vesperis Capitulatur de ipsis Apostolis.

Pluries occurrit in eodem MS.

5. CAPITULARE, In Capitulum convenire tractandorum negotiorum causa. Instrumentum Abbatis et Conventus S. Sequani ann. 1356. e Cartulario Æduensi :

Hinc est quod nos propter hoc in Capitulo nostro specialiter in unum per sonum campanæ, more solito, ad Capitulandum pro negotiis dicti Monasterii et Ecclesiæ ipsius ad tractandum congregati, etc.

Instrumentum Capitulare Monasterii Crassensis ann. 1381 :

Monachis hora Capituli, pulsata Campana, ut moris est, in Capitulo dicti Monasterii pro Capitulando et Capitulum et conventum faciendo..... congregatis, etc.

Occurrit in Actis Capitularib. S. Martini Turon. ann. 1455. et in Actis SS. Martii tom. 3. pag. 752. necnon in Charta ann. 1480. apud Miræum Diplom. Belg. tom. 2. pag. 1343. col. 2.

6. CAPITULARE, Succensere, punire, quod fit in Capitulis Monachorum ubi vitiosi et delinquentes puniuntur et emendantur. Eckeardus Jun. de Casib. S. Galli cap. 3 :

Ad Capitulum tamen non nisi vocatus venit, cum sibi officium Capitulandi et puniendi gravissimum, ut ait, sit traditum.

Hinc vulgaris loquendi Monachis usitata formula, Dare alicui Capitulum, vel Accipere Capitulum, pro reprehendere, et verbis castigare : nostri Chapitrer dicunt. Hinc fortassis a Baldrico apud Mabillonium tom. 5. Annal. Benedict. pag. 505. Capitulum Monachorum vocatur, Animarum fornax purgatoria.

7. CAPITULARE. Pacisci, consentire. Annal. Placent. ad ann. 1447. apud Murator. tom. 20. Script. Ital. col. 892 :

Auditis Placentinorum legatis, quicquid petierunt, Veneti promiserunt, Capitulaverunt.

Charta ann. 1501. ex schedis Pr. de Mazaugues :

Et primo decreverunt, Capitularunt, et Capitulando simul et ad invicem, mediantibus stipulationibus solemnibus hinc inde legitime intervenientibus, concordarunt.

Vide infra Capitulum 9.

8. CAPITULARE, In codicem redigere, ut videtur. Stat. Mantuæ lib. 1. cap. 34. ex Cod. reg. 4620 :

Massarius communis Mantuæ teneatur et debeat singulis semestribus dare singulis notariis, ad maleficia deputatis, libros ligatos, Capitulatos et bullatos bullo Virgilii.

Nisi peculiari nota subscriptos intelligas.

9 CAPITULARE, Brevem lectionem, quæ in divino officio legitur, recitare, quod ad celebrantem, ut vocant, pertinet. Consuet. MSS. monast. S. Crucis Burdegal. ante ann. 1305 :

Nota quod consuetum est in dicto monasterio quod semper in primis et secundis vesperis omnium SS. duplicium, dominica 1^A. Septuagesimæ et Adventus Domini, et Ramis palmarum, dicto capitulo in vesperis seu laudibus, ille qui Capitulat, debet se induere sacris vestibus, et debet incensare omnia altaria ecclesiæ.

Ibidem :

Omnibus festis duplicibus prior claustralis tenetur Capitulare vesperos, matutinos, etc.

Vide alia notione in Capitulum 3.

10. CAPITULARE, Consilium, in Chron. Andr. Danduli ad ann. 1310. apud Murator. tom. 12. Script. Ital. col. 491.