Pileus Altus et Strictus. Stat. provinc. Conc. Trevir. ann. 1310. cap. 114. tom. 2. Hist. ejusd. eccl. Joan. Nic. ab Hontheim pag. 76. col. 1 :

Aliqui (monachi).... Pileis altis et strictis diversorum colorum uti præsumunt, ad instar omnino secularium personarum.

Pileus Clericalis, Qui Clericos deceat, in Concil. Tarracon. ann. 1591. inter Hispan. tom. 4. pag. 509 :

Sotanam vel tunicam talarem, superpelliceum mundum seu roquetum pro tempore congruens et Pileum clericalem induatur.

Pileus Cornutus Judæorum proprius. Synodus Vienn. ann. 1267. in Chron. Mellic. pag. 146 :

Judæi ut dignoscantur cornutum Pileum deferant, deponentes illum pecuniaria pœna puniantur.

Pileus Cornutus, Mitra dicitur ob ejus extremitates in acumen desinentes, apud Cl. vir. Garamp. in Disquis. de sigil. Garfagn. inter not. pag. 73 :

Desuper cappam clausam et in capite pileum cornutum habebat.

Ubi de visione episcopi agitur. Vide supra Cornu 6.

Pileus Crocei Coloris iisdem assignatur, in Statutis Avenion. lib. 1. rubr. 34. art. 5 :

Item quod Judei portent Pileum crocei coloris, quo a Christianis discerni possint.

Pileus Ducatus, Ducum proprius. Viti Arenpeck. Chron. ad ann. 1156. apud Pez. tom. 1. Script. Austr. col. 1196 :

Dux Austriæ, principali amictus veste, supposito ducatus Pileo, etc.

Pileus Fœninus, Eo utebantur mulieres ; unde ignaviæ signum habebatur. Witichindus lib. 3. Annal. refert in toto Ottonis Regis exercitu nullum militem fuisse qui non Fœnino Pileo uteretur ; ut Hugoni, quem pugnaturus erat, illuderet, quasi ab effœminatis esset debellandus.

Pileus Ferratus, pro Forratus, Pellitus, Gall. Fourré, in Statutis Ord. Cisterc. ann. 1212. apud Marten. tom. 4. Anecd. col. 1311.

Pileus Lineus. Stat. synod. eccl. Carcass. ann. 1270. cap. 2. ex Cod. reg. 1613 :

Pileum similiter lineum deferre in publico non attemptent beneficiati, clerici vel in sacris ordinibus constituti ; sed nec etiam alii intra ecclesiam, dum divina celebrantur officia, vel si comparuerint coram nobis.

Pileus Naturalis, Membrana vel pellicula, qua interdum pueri caput involuti nascuntur : unde quos felices esse dicimus, aut futuros auguramur, solemus dicere, ils sont nez coeffez. Lampridius in Diadumeno :

Solent deinde pueri Pileo insigniri naturali, etc.

Pilleus de Pinillis. Vide Pinilla.

Pileus Romarini, in Stat. Mss. eccl. Tull. ann. 1497. fol. 75. v° :

Pileum romarini vel alterius confectionis florum exhibet ipsi episcopo, etc.

Pileus Rubeus ad usum Cardinalium. Vide Galerus.

Pileum Facere, Pileo salutare, quod nostri puerulis non ita pridem occinebant, cum, ut obvios salutarent, identidem urgerent : Faites le chapeau. Joannes Sarisberiensis libr. 3. Polycratici cap. 6 :

Memini me audisse Romanum Pontificem solitum deridere Lumbardos, dicens, eos Pileum omnibus colloquentibus facere, eo quod in exordio dictionis benevolentiam captent, etc.