2. PRESBYTERATUS, Obventiones Presbyteri Parochialis. Arnulfus Lexoviensis Episc. in Epist. pag. 98 :

Causam, quæ inter Hermerium Sacerdotem et Abbatem de cultura super diminutione Presbyteratus Ecclesiæ de Bruslon vertebatur, Majestas vestra parvitati nostræ delegavit ordine judiciario decidendam.

Tabularium Prioratus de Paredo fol. 30 :

Obtulit Deo et dicto loco ipsiusque loci fratribus et ipse et nepos suus partem suam altaris et Presbyteratus, etc.

Fol. 78 :

Omnia, quæ tenebat vel habebat in Ecclesia de Luurciaco, in decimo, vel Presbyteratu, ac in offerenda, dedit Deo ac B. Petro et ad locum Paredi.

Fol. 83 :

Huic loco concessit ipsam Ecclesiam, et cimiterium, et Presbyteratum, et sepulturam, et offerendam, ac decimas, et baptisterium, etc.

Charta ann. 912. in Tabulario Viennensi fol. 18 :

Hoc est Ecclesiam S. Genesii cum suo Presbyteratu, campis, et vinea, nec non et silva ibi pertinente.

Alia ibidem ann. 895. fol. 22 :

Scilicet capellam in honore S. Ferreoli Martyris dicatam,... una cum omni Presbyteratu et dote sua, videlicet in vineis, et terris, et curtulis, et mansionibus, etc.

Alia fol. 23 :

Hoc est quarta pars Ecclesiæ S. Mamerti, cum decimis et primitiis, et altare, et Presbyteratu, et cimiterio, et hæreditate, quæ ad ipsam Ecclesiam pertinet.

Alia ibid :

Ibique in eorum præsentiam se proclamavit, quod Ecclesia, quam ipse tenet in Sisiaco villa in honore S. Petri de illorum communia, nec habet privilegium nec Presbyteratum, unde cessum (censum) solvere possit, quod ei requirebant.

Fol. 45 :

Ecclesiam S. Nazarii... cum omni Presbyteratu ex antiquo ibi debito, et decimis omnibus ibi jure pertinentibus, etc.

Vide Presbyteragium et Presbyterium 4.