1. QUARTARIUM, Genus mensuræ, id est urna. Papias. Joannes de Janua : Quartarium, Mensura quæ quartam partem sextarii capit : quæ etiam Quartellum dicitur. Laurentius in Amalthea :

Quartarium, Quarta pars : item, Quartarius, congii quartam partem continens ; Tertiarium, tertiam.

Glossæ Lat. Gall. Sangerman. : Quartarium, Quarteron. Major mensura videtur in Privilegiis Balduini Flandriæ Comitis ann. 1116. concessis Abbatiæ Elnonensi apud Miræum tom. 2. pag. 1153. col. 2 :

Almanus quasdam sibi injustas consuetudines.... abdicavit, videlicet ad ambas (f. cambas) S. Amandi dimidium Quartarium accipiat, neque creditionem ullam, unde damnum aliquod homines Sancti sustineant, habeat.

2. QUARTARIUM, Modus agri, idem qui Quarteria 1. Chronicon Farfense tom. 2. Muratorii part. 2. col. 536 :

Recepit ibidem modia IV. et Quartaria tria.

Chronicon Casaur. ibid. col. 937 :

Et cambium recepi ego suprascriptus Grimbaldus Episcopus a te domno Ludowico piissimo Imperatore terram tuam loco, ubi dicitur Kantianum, petias duas, hoc est, per mensuram modiorum sexaginta duorum et Quartariorum duorum.

Necrologium MS. Corbeiense ad calcem :

Tria Quartaria emplasseans in terra Benedicti.

Chronicon Bonæ-Spei pag. 257 :

Unum bonarium, XXX. virgas et Quartarium terræ.

Hoc in ultimo loco Quartarium videtur esse tantum quarta pars virgæ quod exprimeremus Trente verges et un quart. Vide Quartarius 3.