Theam, vel Team, est Laudare auctorem, advocare, proferre. Joan. Brompton. :

Theam, est laudare autorem, i. revoucher garant [Anglice vouching to warranty.] : Et quandoque dicitur sequela nativorum.

Priori notione usurpatur in Legibus Edwardi Confess. cap. 25 :

Theam, quod si quispiam aliquid interciet super aliquem, et interciatus non poterit warantum suum habere, erit forisfactura sua, et justitia sua similiter de calumniatore, si defecerit.

Vide Phillips. de Jure Anglos. § 58. et Histor. Jur. Anglic. tom. 2. pag. 152. sqq. infra Warantus. Rursum

Theam, Bromptono, dicitur sequela nativorum, id est jus sequendi servos proprios, si a dominio domini evaserint, aut fugerint, aut in alienam terram transierint : a Saxon. team, soboles, propagatio, quod a tyman, propagare, partum edere, sonat. Cowellus et Rastallus :

Theam est Regale Privilegium, quo qui fruitur, habet villam, et propaginem, id est potestatem habendi nativos, bondos, et villanos in feudo aut manerio suo.

Fletæ lib. 1. cap. 47. § 9 :

Theam est acquietantia amerciamentorum sequelæ propriorum suorum

. Willel. Thorn :

Hoc est, ut habeatis totam generationem villanorum vestrorum cum eorum sectis et catallis ubicumque inventa fuerint ; excepto quod si aliquis nativus quietus per unum annum et diem in aliqua villa privilegiata manserit, ita quod in eorum communiam, vel gildam tanquam unus illorum repertus fuerit, eo ipso a villenagio est exemptus.

Eadem etiam habet Rastallus. Glossar. ad calcem Chartularii Beccensis : Theam, aveir la progenie de vos nays. Adde Skenæum de Verbor. significatione, et ad Regiam Majestatem lib. 1. cap. 4. § 2. ubi

Theme scribitur. Charta Leofrici Comitis pro Fundatione Monasterii B. Mariæ de Coventria in Anglia :

Has autem villas cum medietate prædictæ villæ trado huic monasterio cum saca, et socna, et theloneo, et cum Themo, cum libertate et omnibus consuetudinibus, etc.

Alia ejusdem Comitis :

Has autem terras dedi huic monasterio cum soca, saca, cum telonio, et Theme, etc.

Leges Burgorum Scoticorum cap. 14. § 2 :

Nisi fuerit de proditione (appellatus) vel de Theme, unde se debet defendere bello.

Ubi Skenæus :

i. de quæstione status, al. de furto.

Them, apud Madox Formul. Anglic. pag. 43 :

Cum socha et sacha, et tol, et Them, etc.

Thiem, apud eumd. Madox pag. 47 :

Cum thol et Thiem, etc.

ut et in Chartul. SS. Trinit. Cadom. etc.

Theame, in Quoniam attachiamenta cap. 100. Theam, tom. 1. Monast. Anglic. pag. 307.

Team, Teame, eodem tom. pag. 29.

Teames. Charta Edwardi Confessoris, apud Somnerum in Tractatu de Gavelkind pag. 207 :

Sciatis me dedisse Deo et S. Augustino et fratribus, ut habeant eorum soca et socna, et pacis fracturam, et pugnam in domo factam, et viæ assaltus, et latrones in terra sua captos, latronumque susceptionem, vel pastionem, super illorum proprios homines infra civitatem et extra, teloniumque suum in terra et in aqua, atque consuetudinem, quæ dicitur Teames, et super omnes allodiarios suos, quos eis habeo datos.