Phrygium sumitur pro præcipuo capitis summi Pontificis ornamento, quod hodie triplici corona insigne est, vulgoque Regnum appellant Scriptores, quo in solennibus ceremoniis utitur, quodque a Constantino Mag. Silvestro PP. concessum aiunt. Ementitæ nimirum Constantini donationis fundamento innixi ; qua de re consulendus Papebrochius in Propylæo ad Acta SS. Maii num. 5. et 7. Vetus Interpres Juvenalis Sat. 6 :

Tiara, est Phrygium, quod dicunt.

Arnoldus Abbas Bonæ-vallis de 7. Verbis Domini :

Hac (thyara) etiam minores Sacerdotes utebantur, eratque byssina, circundata coronula aurea, opere textili facta, sicut hodie Phrygium mitris nostrorum Pontificum plerumque consuitur.

Charta donationis Constantini Magni apud Anastasium Biblioth. :

Deinde diadema, videlicet coronam capitis nominis nostri, simulque Phrygium, nec non et superhumerale, etc.

Calistus II. PP. in Epist. ad Stephanum Camerar. Legat. Sed. Apost. :

Et Frigii quidem corona capiti nostro imposita, gaudentes exultantesque per viam sacram ad Lateranense palatium usque solenni ritu nos prosecuti sunt.

Chronicon Mauriniacense lib. 2 :

Ibique Romani Pontificis, ac ut sibi consuetudinis est in sacris magnisque festivitatibus, Frigio coronatus,... ad Ecclesiam matricem pervenit.

Sugerius in Ludovico VI. Rege, de Alexandro PP. :

Cumque Turonis apud S. Martinum, ut mos est Romanis, Frigium ferens, Lætare Hierusalem celebrasset.

Et infra, de Callisto II :

Ibique more Romano seipsos præparantes multo et mirabili ornatu, circundantes capiti ejus Frigium, ornamentum imperiale instar galeæ circulo aureo circuncinnatum, imponunt.

Joan. Sarisberiensis lib. 8. Policrat. cap. 23. de Adriano PP. :

Spinosam dicit Cathedram Romani Pontificis, in tantum acutissimis usquequaque consertam aculeis, tantæque molis, ut robustissimos premat, terat, et comminuat humeros. Coronam et Phrygium clara merito videri, quoniam ignea sunt, etc.

Guido in Vita Cælestini V. PP. apud Murator. tom. 3. pag. 617 :

Romæ itaque Bonifacius Frigii regnive corona festive redimitus.

Denique Jacobus Stephanescus Cardin. lib. 2. de Coronatione Bonifacii VIII. cap. 7 :

Tunc Senior Levita manu diadema venustum

Imperii signum, pavonis cortice candens

Pennarum intexto, gemmis radiantibus auro,

Vallatum in gyro, cui summo in vertice carbo

Evomit et cubito gemmarum maxima flammas,

Imposuit capiti, spheræ cubitique figuram,

Accipiens Phrygium, lapidem fulgoris inanem

Quondam, sed nivei plenum candoris acuto

Vertice contentum gemma, nunc temporis auctum :

Hæc Romana tenens quondam fastigia Cæsar

Constantinus apex statuit, tum primus in orbe

Fonte sacro purgatus herus, propriis sibi Regnum

Seu Phrygium manibus Silvestri in vertice pressit.

Ex qua sane Phrygii Pontificii descriptione colligi potest, similis fuisse figuræ, qua Constantini M. Camelaucium, de quo pluribus egimus in Dissert. 24. ad Joinvillam pag. 291.