SCARAMANNI, vel Scaremanni, Servientes, ministri judicum, sic dicti quasi Schar-man, id est, homines scaræ. Vide Scara 4. Chartæ Henrici III. ann. 1056. et Henrici IV. Imp. ann. 1065. ex Tabulario S. Maximini Trevir. :

Servientes vero, qui Scaramanni dicuntur, nulli Advocato pro quibuslibet culpis, aut rebus, respondeant.

Infra :

Si villani debitum censum Abbati volunt denegare, primum per alios judices ac ministros, qui Scaramanni dicuntur, ad viam reducantur, si possint, etc.

Occurrunt ii pariter in Charta Conradi Comitis Lutzilemburgensis ann. 1135. et alia Theoderici Abbatis in eodem Tabulario. Vide Zyllesium in S. Maximino pag. 40. 45. et infra Scararii.