1. REDDITUARIUS, Manceps, exactor reddituum seu proventuum. Charta Henrici IV. Regis Angl. ann. 1402. de solutionibus propter nuptias Blanchæ filiæ faciendis, apud Rymer. tom. 8. pag. 238. col. 1 :

Ut intentores ac ferventiores Reddituarii pariter et factuarii nostri sint ad solvendam summam quadraginta millium nobilium prædictam, bonam etiam fidem æqua beneficentia compensando.

Franchesiæ villæ de Veer ann. 1471. apud eumdem Rymer. tom. 11. pag. 732. col. 2 :

Reddituariis, custumariis, omnium et singulorum theolonorum et custumarum portuum et passagiorum, etc. Reddituarii villæ Tornacensis,

in Charta ann. 1364. apud Butillarium in Summa rurali fol. 8.

Reddituarii civitatum, oppidorum, castrorum atque villarum,

rursum memorantur in Instrumento ann. 1541. apud Miræum tom. 2. pag. 1062. col. 1. Vide Redditarie et Redituarius.

2. REDDITUARIUS, Qui reditum aliquem singulis annis alteri præstare debet. Lit. curiæ Argentor. ann. 1511. ex sched. D. Schœpfl. :

Sic tamen quod reemtio dictorum reddituum, eorum Reddituariis pro tempore existentibus, juxta dictæ literæ vulgaris principalis tenorem, salva sit et reservata.

Eadem leguntur in alio Instr. ann. 1518. Vide Redituarius 1. et Haltaus. Glossar. German. voce Zins-leute, col. 2162.

3. REDDITUARIUS, Cui pensio annua debetur. Locus est infra in Rentarius 2.

1. REDITUARIUS, Reddituarius, Emphyteota vel alius quivis vectigali obnoxius, qui certos census annuos domino pendit. Literæ Guntheri Præpositi Eccl. Mogunt. ann. 1402. tom. 2. Rer. Mogunt. pag. 886 :

Dicte nostre Prepositure Reddituariis, censuariis, pensionariis, arrendatoribus, decimatoribus, colonis, incolis et subditis... injungimus et mandamus, quatenus prefato D. Ottoni, tamquam nostro et dicte Prepositure nostre Cellerario... de hujusmodi Cellerarie officio, fructibus, redditibus, proventibus, juribus, pertinentiis, obventionibus, subventionibus et emolumentis quibuscumque, prout ad vos et vestrum quemlibet pertinet, integre et libere et cum effectu respondeatis.

Decretum Alphonsi Regis Aragon. ann. 1442. tom. 3. Concil. Hispan. pag. 671 :

Nos enim vobis dicto venerabili Episcopo collectori prædicto vestrisque subcollectoribus in præmissis omnibus..... plenum posse committimus..... mandantes universis et singulis colonis, inquilinis, censuariis, Redituariis et aliis quibuscumque, ad quos spectet, quatenus de omnibus et singulis fructibus, reditibus et proventibus supradictis vobis dicto generali collectori, seu substitutis a vobis et nemini alteri respondeant.

Vide Redditarii, Reddituarius et Renterius.

2. REDITUARIUS, Cui Vectigal debetur, Gall. Rentier. Chronicon S. Bertini tom. 6. Ampl. Collect. Marten. col. 620 :

Ex qua pecunia creditorum esuriem mitigavit, et deinceps statum suæ Ecclesiæ ad plenum cognovit, secundum quem sic se in expensis pensionibusque regulavit, ut et Redituarii sua spe minime frustrarentur, et suus Conventus absque murmure aleretur.