Hostagium Tenere ; Ostager, in Consuet. Britan. art. 112. et seqq. Dicitur de debitore qui intra præfinitos fines consistere tenetur, donec creditori satisfecerit. Charta ann. 1291. ex Chartul. S. Johannis Angeriac. pag. 278 :

Ego dictus miles (obligo) corpus meum ad facienda seu tenenda Hostagia seu teneterias infra muros castri S. Johannis, per tantum tempus donec de præmissis sit eidem Abbati plene et integre satisfactum.

Statuta Massil. lib. 2. cap. 1. § 19 :

Curia..... debitorem, si tamen masculus est, quicumque sit, dum tamen pubes sit, vel major pubere, per sacramentum ab eo inde factum, vel exactum, continue Hostagia tenere compellat ubicumque dicta curia statuet infra hos terminos Hostagia communiter teneri.

§ 20 :

Terminos autem tenendi Hostagia per hoc statutum assignamus masculis debitoribus, quos terminos hujusmodi ponimus, videlicet in carreria palatii Massiliæ ex parte Occidentis quatenus extenditur, etc. Ista loca modo assignata, faciat dicta curia ab hostagiariis observari, quando jussu judicis debitores ad tenendum Hostagia compellentur, ita scilicet quod inde nullatenus recedat hostagiarius, absque licentia et voluntate expressa creditorum suorum, usquequo ab ipso debitore... sit in solidum satisfactum.

§ 21 :

Si vero dictus debitor mulier est vel erit, illa similiter compellatur ad tenendum inde Hostagia a dicta curia, ut supra dictum est per omnia de debitore masculo, eo excepto quod ipsa mulier Hostagia dicta non teneat, in loco illo ubi homines tenent ea, sed in domo sua, vel patris sui, vel matris, vel mariti aut soceri, vel socrus suæ, vel in domo ubi morabitur stagiam faciendo.

Vide Obstagium.

Hostagius, Ostagius, Hostiagius, Obses, Hostage. Guill. de Podio-Laurentii cap. 14 :

Ipso vicecomite... in Ostagium remanente.

Adde Henric. Knyghton. ann. 1295. Sic autem dictus, quod obses in alterius potestatem transiret, ejusdem hospes esset, uti supra observatum ; præterea sponsor, præs, qui pro altero spondebat sacramento interposito : quia si is, cujus præs erat, pactum non adimpleret, in potestatem illius, cui fidejussionem præstiterat, transibat, donec illud adimpleretur. Charta Ricardi Regis Angliæ ann. 1195. apud D. Brussel de Usu feud. tom. 2. pag. xvii :

Hiis omnibus pactis, Comes Leicestriæ, et omnes prisones et Hostagii prisonum, prout divisum est hinc et inde liberabuntur.

Tabularium Eleemosynæ S. Pauli Viennensis :

Et Guigo Peira et Adalardus frater suus se ipsos obsides posuerunt, quatenus si in terra illa Eleemosynæ ab aliquo inferretur injuria, postquam Eleemosynæ Custos eos monuerit per se vel per nuntium suum, intra 7. dies ad Siurenum in Obstagium venirent, et ita manerent ibi, donec injuria illa integre emendata esset.

Epist. 61. ex Francicis tom. 4. Hist. Francor. :

Milites etiam et burgenses totius territorii Nigellæ Ostagii sunt per sacramentum hujus conventionis tenendæ ; hac conditione, si Comitissa in hæredem, vel hæres in Comitissam insurgeret, ille, in quem alter insurgeret, si Ostagios submoneret, aut infra 15. dies ei, cui injuria illata esset, emendari facerent, aut donec emendatum esset, parti ejus adhærerent, et, postquam emendatum esset, ad pristinum statum redirent.

Charta ann. 1239. ex Tabul. S. Aniani Aurelian. :

De his autem fideliter et firmiter observandis fidejussores sunt isti,... qui similiter fide in manu nostra promiserunt, quod in civitate Aurelianensi prisionem tenebunt Militis donec præfatus venditor fecerit garentiam, etc.

Ubi prisio Militis, est qualis Militem decet. Observantiæ Regni Aragon. lib. 9. tit. de Cessione bonorum § 1 :

In commanda non habet locum cessio bonorum, nec admittitur ; sed solum in mutuo admittitur. Est autem consuetudo regni, quod si debitor commandæ captus detineatur per judicem, quia non reddit depositum, si petat se tradi custodiæ creditoris, est sibi tradendus, prius tamen creditore assecurante vitam et membra, et quod dabit sibi comestionem sufficientem, et tenebit eum captum in loco decenti. Si autem depositarius noluerit ipsum recipere, et de prædictis cavere, judex debet ipsum a captione liberare.

Alia hujusce ritus exempla profert Anton. Brandaon. tom. 4. Monarch. Lusitan. pag. 271. v. 272. ut et vir eruditissimus Dionysius Salvaingus Boissius in Tractatu de Usu feudor. cap. 73. Vide Obses.

Hostaticus, Obses, interdum fidejussor, Italis Statico. Vetus Charta apud Beslium pag. 390 :

Dedit autem Bernardus Comitem in plevone Hugoni, et 4. Hostaticos, per talem conventum, quod si Bernardus per fidem attenderit tibi tuas convenientias, ego eos tibi reddam in captionem, etc.

Occurrit ibi pluries. Concilium Helenense ann. 1065. et Constitutio Jacobi I. Regis Aragon. pro Treuga domini :

Fidejussores vel Hostatici.

Charta Guillelmi D. Montispessulani ann. 1109 :

De centum marchis persolvendis sunt firmantiæ et Hostatici, etc.

Chron. Modoet. lib. 3. apud Murator. tom. 12. col. 1155 :

In his verbis multi nostrum timuerunt ne vellet nos tenere prout Hostatici.

Pluries ibi. Chronic. Estense apud eumdem Murator. tom. 15. col. 339 :

Exivit de dictis carceribus relinquendo ibi Hostaticos tres filios suos, et alios Barones, etc.

Vide Consuet. Britan. art. 112. et seqq. Adde Chartam Hispanicam apud Blancam in Comment. Rer. Aragon. pag. 635. aliam apud Martinezium in Histor. Pinnatensi lib. 3. cap. 5. et Molinum in Repertorio voce Hostagium.

Hostaticum, Ostaticum, Obsidium, Hostage. Charta ann. 1316. qua Arnaldus de Corsavino recognoscit debere se Sancio Regi Majoricarum 60. mill. sol. Barcin. ob observantiam hostaticorum, ad quam tenebatur in villa de Coirio : ....

Nos spectata aliqua monitione veniemus intus villam de Coirio, ubi tenebimus et servabimus prædictos Hostaticos

. Charta ann. 1156. ex Bibl. Sebusiana Cent. 1. cap. 24 :

Ita tamen, quod ibi securus sim a vobis per omnia, præter Ostaticum tenendum, sine vestro enganno, quod inde aliquo modo non egrediar, donec supradicti.... reddant vobis Castrum de Trencatallia, etc.

Charta Joannis XIII. PP. apud Ughellum tom. 2. pag. 15 :

Neque ripaticum, aut teloneum, sive Ostaticum, neque paratum...... faciant.

Sed hic pro Hostiaticum videtur sumi.

Hostaticare. Vide Opsticare.

Ostagius, Obses, fidejussor, sponsor.

Obsides et Ostagii

, in Literis Matthæi Ducis Lotharingiæ tom. 1. Ampliss. Collect. Marten. col. 1032.

Ostagii pacis

, in Charta ann. 1208. tom. 2. Hist. Lotharingiæ col. XXLXXVI.

Nos autem et Ostagii prænominati juravimus hæc omnia fideliter observanda

, in Charta ann. 1200. apud Duchesnium Hist. Norman. pag. 1058. Vide Hostagius.